Bagian I:

maprabawa ketug lindu

sumiyok hujan rajane teja ngadeg lan kawukung

senjata pada rumihin

panganggone sarwa ngendih

sahanane permas rakta

galang endih murub

luwir mretyu sumilir

Bagian II:

ring pascima ida turun

nagapasa sanjatane

saupa carane dumun

busanane kuning-kuning

katon kadi gunung sari

payase angrawit tinon

mapanekes gelung

sarwa mas kornadi

Bagian III:

ring utara ida turun

sami kresna busanane

senjata cakrane dumun

kilape pada meganti

maduluran hujan angin

tatit kilape mecanda

angine mangnilus

luwir mabur langit

Bagian IV:

brahma wisnu wus ngerangsuk

iswara mahadewane

iriki pada malunguh

siwa ring madya nyelehin

pada mangelingin linggih

brahma tengen wisnu kika

iswara ring hayun

maha dewa nguri

Bagian V:

sampun ida mraga putus

raris munggah kagedonge

gedong ratna saking luhur

hyang wismakarma mekardi

makori emas mangerawit

magocira windu cara

sasocane mancur

sarwa mirah manik

Bagian VI:

telagane misi tunjung

wetara sura Nadine

papetete saking luhur

punika wantah pinuji

tunjunge mesari kuning

mapelawa mas metatah

gandane mengalun

sekar solas warni

Bagian VII:

manik mancur mira dadu

ratna nila lan widura

manglencok endih murub

mengasorang tejan rawi

pateh ring rahina wengi

ring nature mekalangan

metaja kaluhur

majelijih manik

Bagian VIII:

mahideran sarwa santun

nawang sahenan sekare

sami pada mangalum

sumargana merik sumirik

para sutrine menangkil

menyaksinin patyane

sami ngawa kukus

maduluran bhakti

Bagian IX:

om dewa siwa kasungsung

siwa asta dala yukti

pangideran bhuwana agung

aksarannya makasami

nawa sanga siwa sakti

padma sana asta dala

agung adi luhung

siwa maha murti