Bagian I:
Ida Ratu saking luhur
Kawula nunas lugrane
Mangda sampun titiang tanwruh
Mengayat Bhatara mangkin
Titiang ngaturang pajati
Canang suci lan daksina
Sami sampun puput
Pratingkahing saji
Bagian II:
Asep menyan majagau
Cendana nuhur dewane
Mangda Ida gelis rawuh
Mijil saking luhuring langit
Sampun madabdaban sami
Maring giri meru reko
Ancangan sadulur, sami pada ngiring
Bagian III:
pangastuti kaluhur
angregepang radanane
ne ring purwa puji dumun
ring daksina ne kaasti
pascima sareng astute
ring uthara karedana
mantuk madyeng bhayu
mayoga nganjali
Bagian IV:
Sada Ciwa majagau
Prama Ciwa candanane
menyane Bhatara Guru
kukuse nepud ka langit
punika anggen pamargi
pacang turun ring kahyangan
mangda gelis rawuh
manusa manyiwi
Bagian V:
Pangredanane kaluhur
turun Ida Bhatarane
saking purwa Ida turun
skendran sami mengiring
Widyadara-Widyadari
sami pada papatehan
panganggene murub
sarwa ratna ngendih
Bagian VI:
Pangastawane kaluhur
maka pangundang dewane
asep menyan majegau
ambunnyane mrik sumirit
candana pada masandi
mamendak Ida Bhatara
Anggena di luhur
ngaran tiga Cakti
Bagian VII:
Iringane sami kumpu
pada becik tatane
ane ring pasamuan agung
saidering Padma-Sari
pinuji sanjata nyandi
danda cakra ngapaca
bajrane ring hayun
mapan Panca Dewi
Bagian VIII:
Brahma Wisnu wus mengerangsuk
Icwara Mahadewane
irike pada malungguh
Ciwa ring madya nyelehin
pada mangolingin linggih
Brahma tengen Wisnu kiwa
Icwara ring hayun
Mahadewa nguri
Komentar